ബെവ്‌ ക്യു ആപ്പിനെ കുറിച്ചുള്ള പരാതികൾ അവസാനിക്കുന്നില്ല. മാസങ്ങൾക്ക് ശേഷം മദ്യവിതരണം ആരംഭിച്ചുവെങ്കിലും മദ്യപാനികൾ ഇപ്പോഴും വിഷമത്തിൽ തന്നെ. ഒരുപാട് കടമ്പകൾ കടന്ന് വേണം മദ്യം ലഭിക്കാൻ. ഈ അവസരത്തിൽ സർക്കാരിനെയും ആപ്പിനെയും പരിഹസിച്ച് രംഗത്തെത്തിയിരിക്കുകയാണ് സംവിധായകനും നടനുമായ ജോയ് മാത്യു. 'നമ്മൾ ദൈവരാജ്യത്തോട് അടുക്കുന്നു' എന്ന തലക്കെട്ടോടെ ആണ് ജോയ് മാത്യു ഫേസ്ബുക്കിൽ കുറിപ്പ് പോസ്റ്റ് ചെയ്തിരിക്കുന്നത്.
മദ്യപാനികളെ നേർവഴിക്ക് നടത്താനും മദ്യപാനത്തിൽ നിന്ന് മോചിപ്പിക്കാനും ആണ് സർക്കാർ ഈ ആപ്പ് കൊണ്ട് ഉദ്ദേശിക്കുന്നതെന്ന് അദ്ദേഹം പറഞ്ഞു. ഇടതുപക്ഷം തെരഞ്ഞെടുപ്പ് പ്രകടനപത്രികയിൽ പറഞ്ഞ പോലെ ഘട്ടം ഘട്ടമായി മദ്യലഭ്യത കുറയ്ക്കുന്നതോടെ മദ്യപാനികളിൽ മദ്യാസക്തി കുറയുകയും അത് വഴി മദ്യവിമുക്തമായ, ദൈവത്തിന്റെ സ്വന്തം നാടായ കേരളം മാറുകയെന്നും ചെയ്യുമെന്ന് അദ്ദേഹം കുറിപ്പിൽ പറയുന്നു. ഇക്കാര്യം നമ്മുടെ IT വകുപ്പിന് മനസ്സിലായില്ലെങ്കിലും സ്വകാര്യ കമ്പനിക്ക് മനസ്സിലാവുകയും ചെയ്തു.
എങ്ങനെയാണ് സർക്കാരിന്റെ ഈ ആപ്പ് അതിന് സഹായിക്കുന്നത് എന്നതിന് രസകരമായി വിശദീകരണം നൽകുന്നുമുണ്ട്‌ അദ്ദേഹം. ആപ്പ് വഴി മദ്യം ബുക്ക് ചെയ്യുമ്പോൾ ദൂരെയുള്ള മദ്യശാലയിൽ ടോക്കൻ ലഭിക്കുകയും ഇത്രയും ദൂരം സഞ്ചരിച്ച് അവിടെ എത്തിയാൽ വാങ്ങാൻ ഉദ്ദേശിച്ച മദ്യം ഇല്ലായെന്ന് മറുപടി കേൾക്കുകയും തുടർന്ന് അവിടെ ബാക്കിയുള്ള കൂതറ ചരക്കുകൾ വാങ്ങി കുടിക്കുകയും ചെയ്താൽ പിന്നെ ഒരിക്കലും അയാൾ മദ്യം കൈകൊണ്ട് തൊടില്ലായെന്നും ജോയ് മാത്യു പറയുന്നു.
"കള്ളുകുടിയന്മാരെ നേർവഴിക്ക് നടത്താനും അവരെ മദ്യപാനാസക്തിയിൽ നിന്നും മോചിപ്പുക്കുവാനുമായി കേരള ഗവണ്മെന്റ് നടപ്പിലാക്കിയ ആപ്പ് പരിപാടിയെ എന്തുകൊണ്ടാണ് മദ്യവിരുദ്ധ പ്രസ്ഥാനക്കാർ പിന്തുണക്കാത്തത്?", ജോയ് മാത്യു ചോദിക്കുന്നു.
മദ്യപാനം ഒരു ശീലമാക്കിയ മലയാളികളെ മദ്യാസക്തിയിൽ നിന്നും മോചിപ്പിക്കാൻ കേരള ഗവണ്മെന്റ് ഈ ശുഷ്കാന്തിയെ നമ്മൾ പിന്തുണച്ചില്ലെങ്കിൽ പിന്നെ ആരാണ് പിന്തുണക്കുക എന്നും അദ്ദേഹം ചോദിക്കുന്നു.
ബെവ്‌ ക്യു ആപ്പിനെ കുറിച്ച് പരിഹാസരൂപേണ അദ്ദേഹം എഴുതിയ കുറിപ്പ് ഫേസ്ബുക്കിൽ വൈറൽ ആയിരിക്കുകയാണ്.
ഫേസ്ബുക്ക് പോസ്റ്റിന്റെ പൂർണ്ണരൂപം :
നമ്മൾ ദൈവരാജ്യത്തോട് അടുക്കുന്നു
------------------------------------------------
കള്ളുകുടിയന്മാരെ നേർവഴിക്ക് നടത്താനും അവരെ മദ്യപാനാസക്തിയിൽ നിന്നും മോചിപ്പിക്കുവാനുമായി കേരള ഗവൺമെന്റ് നടപ്പിലാക്കിയ ആപ്പ് പരിപാടിയെ എന്തുകൊണ്ടാണ് മദ്യവിരുദ്ധ പ്രസ്ഥാനക്കാർ
പിന്തുണക്കാത്തത് ?
സ്വന്തമായി ഒരു ഐ ടി വകുപ്പും വകുപ്പിന് ഒരു മന്ത്രിയും അതിനു കീഴെ ഐ ടി സെക്രട്ടറി . അതിന്നും കീഴെ നിരവധി ഐ ടി പ്രൊഫഷണലുകൾ(ചിരിക്കാൻ വേണ്ടി പറഞ്ഞതല്ല) പിന്നെ ഇവർക്ക് തുലയ്ക്കുവാൻ പൊതുഖജാനാവ് !.എന്നിട്ടും ഇവർക്കൊന്നും സാധിക്കാത്ത കാര്യം ഒരു സ്വകാര്യ കമ്പനിക്ക് കരാർ കൊടുത്തതിന്റെ ഗുട്ടൻസ് ആർക്കും മനസ്സിലായിട്ടില്ല.അവിടെയാണ് സർക്കാരിന്റെ ജനങ്ങളോടുള്ള പ്രതിബദ്ധത തിരിച്ചറിയേണ്ടത് .
ഇടതുപക്ഷം തെരഞ്ഞെടുപ്പ് പ്രകടനപത്രികയിൽ പറഞ്ഞപോലെ ഘട്ടം ഘട്ടമായി മദ്യലഭ്യത കുറയ്ക്കുന്നതോടെ മദ്യപാനികളിൽ മദ്യാസക്തി കുറയുകയും അതുവഴി മദ്യവിമുക്തമായ ,ദൈവത്തിന്റെ സ്വന്തം നാടായി കേരളം മാറുകയും ചെയ്യും.ഇത് നമ്മുടെ ഐ ടി വകുപ്പിന് മനസ്സിലായില്ല.എന്നാൽ സ്വകാര്യകമ്പനിക്ക് മനസ്സിലാവുകയും ചെയ്തു .
അത് മനസ്സിലാക്കിത്തന്നെയാണ് ഗവൺമെന്റ് ഈ പുതിയ ആപ്പ് മദ്യപാനികളിൽ അടിച്ചു കേറ്റിയിരിക്കുന്നത്ത് .സംശയമുണ്ടെങ്കിൽ നിങ്ങൾ ഇതൊന്നു ഡൌൺ ലോഡ് ചെയ്യൂ .നിങ്ങൾ കോഴിക്കോട്ടുകാരനാണെങ്കിൽ നിങ്ങൾക്ക് കണ്ണൂരിലെ ഒരു ബാറിൽ നിന്നും മദ്യം കിട്ടും.കോട്ടയംകാരനാണെങ്കിൽ കൊച്ചിയിലും കൊച്ചിക്കാരനാണെങ്കിൽ കാഞ്ഞിരപ്പള്ളിയിലും! ആപ്പിൽപ്പെട്ട പാവം മദ്യപാനി ഇത്രയൂം ദൂരം യാത്ര ചെയ്തു ആപ്പ് നിർദ്ദേശിച്ച സ്ഥലത്ത് എത്തിയാലോ? സാധനം തീർന്നു എന്നായിരിക്കും ഉത്തരം .അല്ലെങ്കിൽ ബീവറേജിൽ വിറ്റഴിയാതെ കെട്ടിക്കിടക്കുന്ന കൂതറ ചരക്കുകൾ ഭാഗ്യമുണ്ടെങ്കിൽ കിട്ടിയെങ്കിലായി .അത് അടിച്ചു കഴിഞ്ഞാലോ, ജീവിതത്തിൽ പിന്നെ ഒരിക്കലും അയാൾ മദ്യം കൈകൊണ്ടു തൊടില്ല ,
ഇങ്ങിനെയൊക്കെയല്ലാതെ എങ്ങിനെയാണ് നമ്മുടെ സംസ്ഥാനം മദ്യവിമുക്തമാക്കേണ്ടത് ?
മദ്യപാനം ഒരു ശീലമാക്കിയ മലയാളികളെ മദ്യാസക്തിയിൽ നിന്നും മോചിപ്പിക്കാൻ കേരള ഗവൺമെന്റ് കാണിക്കുന്ന ഈ ശുഷ്കാന്തിയെ നമ്മൾ പിന്തുണച്ചില്ലെങ്കിൽ പിന്നെ ആരാണ് പിന്തുണക്കുക ! .ചുരുങ്ങിയപക്ഷം സഖാക്കളെങ്കിലും ഇക്കാര്യത്തിൽ ഒരു തീരുമാനമെടുക്കേണ്ട സമയം അതിക്രമിച്ചിരിക്കുന്നു.
ഇമ്മാതിരി ഒരു ആപ്പ് കണ്ടുപിടിച്ച സ്വകാര്യ കമ്പനിയെയും അതിലെ ആപ്പ് ശില്പികളെയും ആദരിക്കാൻ കേരള ജനത രാഷ്ട്രീയ ഭേദമെന്യേ തയ്യാറായി കഴിഞ്ഞു ,അവർ ഒന്ന് പുറത്തേക്ക് വന്നാൽ മാത്രം മതി.
