കോട്ടയം നഗരത്തിൽ യുവാവിനെ പൊലീസ് സ്റ്റേഷനു മുന്നില്‍ കൊന്നു കൊണ്ടിട്ട സംഭവത്തിൽ പ്രതിയുടെ മൊഴി പുറത്ത്. ഷാൻ ബാബുവിനെ കൊല്ലാന്‍ ഉദ്ദേശിച്ചില്ലെന്ന് പ്രതി കെ.ടി.ജോമോന്‍ പൊലീസിനു നൽകിയ മൊഴിയിൽ പറയുന്നു.
എതിര്‍ഗുണ്ടാ സംഘത്തിലെ ചിലരെ കണ്ടെത്തുകയായിരുന്നു ലക്ഷ്യം. നാടുകടത്തപ്പെട്ടതിനെ തുടർന്ന് നഷ്ടപ്പെട്ട സ്വാധീനം തിരിച്ചു പിടിക്കാനും ആക്രമണത്തിലൂടെ ഉദ്ദേശിച്ചിരുന്നുവെന്നും പ്രതി പൊലീസിനോട് പറഞ്ഞു.
അതേസമയം, തനിച്ചാണ് കൊലപാതകം നടത്തിയതെന്ന പ്രതിയുടെ മൊഴി വിശ്വസിച്ചിട്ടില്ലെന്നും കൂടുതൽ പേർ കൊലപാതകത്തിനു പിന്നിലുണ്ടോ എന്ന് പരിശോധിക്കുമെന്നും കോട്ടയം എസ്പി ഡി.ശിൽപ പറഞ്ഞു. ഇന്നു പുലർച്ചെയാണ് സംഭവുണ്ടായത്. കെ.ടി.ജോമോൻ, ഷാൻ ബാബുവിനെ രാത്രി വീട്ടിൽനിന്ന് കൂട്ടിക്കൊണ്ടുപോയ ശേഷം കൊലപ്പെടുത്തി സ്റ്റേഷനു മുന്നിൽ കൊണ്ടിടുകയായിരുന്നു.
