കേരള വ്യാപാരി വ്യവസായി ഏകോപന സമിതി സംസ്ഥാന അധ്യക്ഷൻ ടി നസറുദ്ദീനോടുള്ള ആദര സൂചകമായി ഇന്ന് സംസ്ഥാന വ്യാപകമായി വ്യാപാരസ്ഥാപനങ്ങൾ അടച്ചിടുന്നു. എന്നാൽ പാലായിലെ ഒരു കൂട്ടം വ്യാപാരികൾ അനുശോചനം രേഖപ്പെടുത്തുകയും കടകൾ തുറന്ന് ലാഭം ജീവകാരുണ്യ പ്രവർത്തനത്തിന് വിനിയോഗിക്കുകയും ചെയ്തു.
പാലാ കൊട്ടാരമറ്റം സാന്തോം കോംപ്ലക്സിലെ വ്യാപാരികളും പാലാ കെസ്വാ യൂണിറ്റ് ഭാരവാഹികളും സംയുക്തമായി ചേർന്ന്ആണ് ചടങ്ങ് സംഘടിപ്പിച്ചത്.
കടകൾ അടച്ചിട്ട് വ്യാപാരം മുടക്കുന്ന പ്രവണതയ്ക്കെതിരെ ഏറ്റവും ശക്തമായി നിലപാടെടുത്തിരുന്ന വ്യക്തിയാണ് നസുറുദ്ദീൻ. അതുകൊണ്ടുതന്നെ അദ്ദേഹത്തിൻറെ വിയോഗത്തിൽ ദുഃഖം രേഖപ്പെടുത്തുവാൻ കടകൾ അടച്ചിടുന്നു എന്നുള്ളത് അദ്ദേഹം മുന്നോട്ടു വെച്ചിരുന്ന ആദർശങ്ങൾക്ക് വിരുദ്ധമാണ് എന്ന് സെന്റ് ജ്യൂഡ് ഇലക്ട്രിക്കൽസ് ഉടമ കെസ്വാ ജില്ലാ എക്സിക്യൂട്ടീവ് മെമ്പറുമായ ബിജു പറഞ്ഞു.
മഹാമാരിയുടെ വെല്ലുവിളികൾ ഏറ്റവും അധികം ബാധിച്ച വ്യാപാര സമൂഹത്തിനും, അവിടുത്തെ തൊഴിലാളികൾക്കും ഇത്തരം ഒരു കടമുടക്കം വലിയ പ്രതിസന്ധി സൃഷ്ടിക്കും. ഹോട്ടലുകളും ബേക്കറികളും ഇന്നലെ തന്നെ ഇന്നത്തെക്കുള്ള വിഭവങ്ങൾ തയ്യാറാക്കി തുടങ്ങിയിട്ടുണ്ടാവും. ഇന്നത്തെ കടമുടക്കം വിവിധ മേഖലകളിൽ തൊഴിൽ സ്തംഭനത്തിന് ഇടയാക്കും. ഓട്ടോ തൊഴിലാളികളെയും ഇത് ബാധിക്കും. ഇക്കാര്യങ്ങളെല്ലാം കണക്കിലെടുത്ത് ടി നസറുദ്ദീൻനോടുള്ള ആദരസൂചകമായി പാലാ സെൻറ് ജൂഡ് ഇലക്ട്രിക്കൽസ് വ്യത്യസ്തമായ ഒരു മാതൃക സൃഷ്ടിക്കുകയാണ്.
കഴിഞ്ഞ ദിവസങ്ങളിലെ ലാഭവിഹിതം ഇലക്ട്രിക്കൽ മേഖലയിൽ തൊഴിൽ ചെയ്യുന്ന രണ്ടു തൊഴിലാളികൾക്ക് അവരുടെ ഭവന നിർമ്മാണ പ്രവർത്തനങ്ങൾക്ക് ഒരു സഹായ ഹസ്തം എന്ന നിലയിൽ കൈമാറി.
കൊട്ടാരമറ്റം ശാന്തോം കോംപ്ലക്സിൽ ഉള്ള സെൻറ് ജൂഡ് ഇലക്ട്രിക്കൽസ് ഷോറൂമിൽ വച്ച് ആണ് അനുശോചന യോഗം ചേർന്നത്. സമ്മേളനത്തിൽ കെസ്വാ പാലാ യൂണിറ്റ് പ്രസിഡന്റ് ബൈജു കോയിക്കൽ, ട്രഷറർ ശിവദാസ്, സാന്തോം കോംപ്ലക്സിലെ വ്യാപാരികളും വ്യവസായികളും പങ്കെടുത്തു.
