കടുത്തുരുത്തി: പെരുമ്പാമ്പും മുട്ടകളുമായി നാട്ടുകാർ പൊലീസ് സ്റ്റേഷനിൽ. വനം വകുപ്പ് അധികൃതരെത്തി പാമ്പിനെ ഏറ്റെടുത്തിട്ട് നാട്ടുകാർ പോയാൽ മതിയെന്ന് പൊലീസ്. ഇതോടെ സ്റ്റേഷനിൽ തർക്കമായി.
കടുത്തുരുത്തി സ്റ്റേഷനിൽ ചൊവ്വാഴ്ച ഉച്ചയ്ക്കാണു സംഭവം. മണ്ണുമാന്തിയന്ത്രം ഉപയോഗിച്ച് ആപ്പാഞ്ചിറ തോട് വൃത്തിയാക്കുന്നതിനിടെയാണ് പാമ്പിനെ നാട്ടുകാർ പിടികൂടിയത്. 15 മുട്ടകളും ലഭിച്ചു. നാട്ടുകാർ പെരുമ്പാമ്പിനെ പ്ലാസ്റ്റിക് ചാക്കിലാക്കി. പെരുമ്പാമ്പിനെ ഓട്ടോയിൽ കയറ്റി പൊലീസിന് കൈമാറാനായി സ്റ്റേഷനിലെത്തി.
വനം വകുപ്പിനു കൈമാറണമെന്നും പാമ്പിനു പരുക്കുണ്ടോയെന്ന് പരിശോധിക്കണമെന്നും പൊലീസ് അറിയിച്ചു. ഇതോടെ നാട്ടുകാരും പൊലീസുമായി തർക്കമായി. ഇതോടെ നാട്ടുകാർ പഞ്ചായത്തംഗം നോബി മുണ്ടയ്ക്കനെ വിളിച്ചു വരുത്തി. പാമ്പുമായെത്തിയ സംഘത്തിലെ പലരും ഇതിനിടെ സ്റ്റേഷനിൽ നിന്നു മുങ്ങി.
തുടർന്ന് പഞ്ചായത്തംഗം നോബി ഉത്തരവാദിത്തം ഏറ്റെടുത്ത് സ്റ്റേഷനിൽ തുടർന്നു. രണ്ടരയോടെ വനം വകുപ്പ് അധികൃതരെത്തി ഏറ്റെടുത്തു.
