ഓണ്‍ലൈന്‍ ടിക്കറ്റ് വില്‍പ്പനയ്ക്ക് കെ.എസ്.ആര്‍.ടി.സി.ക്കും സ്വിഫ്റ്റിനും പ്രത്യേക വെബ്സൈറ്റുകള്‍ ഏര്‍പ്പെടുത്തിയപ്പോള്‍ ബുക്കിങ്ങില്‍ വന്‍ ഇടിവ്.
വേനലവധിക്കാലത്ത് ബുക്കിങ് സംവിധാനം മാറ്റിയതും പഴയ വെബ്സൈറ്റില്‍ ലഭിക്കുന്ന ബുക്കിങ്ങുകള്‍ പുതിയതിലേക്ക് കൈമാറുന്നതില്‍ ഐ.ടി. വിഭാഗത്തിന് സംഭവിച്ച പാളിച്ചയുമാണ് വരുമാനനഷ്ടത്തിന് ഇടയാക്കുന്നത്. രണ്ടാഴ്ചയായി ബുക്കിങ് ഗണ്യമായി കുറഞ്ഞിരിക്കുകയാണ്.
കെ.എസ്.ആര്‍.ടി.സി. ഉടമസ്ഥതയിലുള്ള വെബ്സൈറ്റിലാണ് ഏപ്രില്‍വരെ സ്വിഫ്റ്റിന്റെ ബുക്കിങ്ങും സ്വീകരിച്ചിരുന്നത്. സ്വിഫ്റ്റിനുവേണ്ടി പുതിയ മേല്‍വിലാസം ഒരുക്കി ബുക്കിങ് മാറ്റിയപ്പോള്‍ യാത്രക്കാരെ അറിയിക്കുന്നത് ഉള്‍പ്പെടെയുള്ള ക്രമീകരണങ്ങള്‍ പാളി.
സ്വിഫ്റ്റ് ബസുകളില്‍ ഇപ്പോഴും പഴയമേല്‍വിലാസവും പ്രദര്‍ശിപ്പിച്ചിട്ടുണ്ട്. യാത്രക്കാര്‍ക്ക് പഴയ വെബ്സൈറ്റാണ് പരിചിതം.
സ്വിഫ്റ്റിന് പ്രത്യേകം ബുക്കുചെയ്യണമെന്ന സന്ദേശം ഈ പേജില്‍ തെളിയുന്നുണ്ടെങ്കിലും ഫലപ്രദമല്ല. തിരച്ചില്‍ നടത്തുമ്പോള്‍ കെ.എസ്.ആര്‍.ടി.സി. ബസുകള്‍ മാത്രമാണ് കാണിക്കുന്നത്.
ഇതിനൊപ്പം സ്വിഫ്റ്റ് ബസുകളുടെ പുതിയ വെബ്സൈറ്റിലേക്ക് ലിങ്ക് കൊടുത്തിരുന്നെങ്കില്‍ ബുക്കിങ് നഷ്ടമാകില്ലായിരുന്നു. ഇത്തരം സാഹചര്യങ്ങളില്‍ പഴയ വെബ്സൈറ്റില്‍വരുന്ന തിരയലുകള്‍ പുതിയ വെബ്സൈറ്റിലേക്ക് തിരിച്ചുവിടുകയാണ് പതിവ്.
