സമ്മിശ്ര പ്രതികരണങ്ങൾക്കിടയിലും ആദ്യദിനങ്ങളിൽ മികച്ച കളക്ഷൻ നേടിയ ചിത്രത്തിന് പിന്നീടത് നിലനിർത്താനായില്ല. ഇപ്പോൾ വീണുപോയ കളക്ഷനെ തിരിച്ചുപിടിക്കാൻ പുതിയ തന്ത്രവുമായെത്തിയിരിക്കുകയാണ് നിർമാതാക്കളായ ടി-സീരീസ്.
റിലീസ് ചെയ്ത് ഒരാഴ്ചയാവുന്ന അവസരത്തിലാണ് പുതിയ നീക്കവുമായി 'ആദിപുരുഷ്' നിർമാതാക്കൾ രംഗത്തെത്തിയത്. ചിത്രത്തിന്റെ ടിക്കറ്റ് നിരക്ക് അടുത്ത രണ്ട് ദിവസം 150 രൂപയായിരിക്കുമെന്ന് ടി-സീരീസ് അധികൃതർ ട്വിറ്ററിലൂടെ അറിയിച്ചു.
ജൂൺ 22, 23 തിയതികളിലാണ് 150 രൂപ ടിക്കറ്റ് നിരക്കിൽ ചിത്രം കാണാൻ സാധിക്കുക. എന്നാൽ ത്രീ– ഡിയിൽ ചിത്രം കാണാൻ ആഗ്രഹിക്കുന്നവർക്ക് കൂടുതൽ തുക നൽകേണ്ടി വരും.
കേരളം, തമിഴ്നാട്, ആന്ധ്രാ പ്രദേശ്, തെലങ്കാന എന്നീവിടങ്ങളിൽ ഈ ഓഫർ ലഭിക്കില്ലെന്നും നിർമാതാക്കൾ അറിയിച്ചിട്ടുണ്ട്. ടിക്കറ്റ് നിരക്ക് കുറച്ചതായി അറിയിച്ചുകൊണ്ടുള്ള പുതിയ പോസ്റ്ററും പുറത്തിറക്കിക്കഴിഞ്ഞു.
