പഠന കൂട്ടായ്മകൾക്ക് പ്രാധാന്യമേറുന്നു: ഡാന്റീസ് കൂനാനിക്കൽ

പാലാ: വിദ്യാർത്ഥികളുടെ സമഗ്രമായ വ്യക്തിത്വവികസനമാണ് വിദ്യാഭ്യാസം ലക്ഷ്യം വെക്കുന്നതെന്നും ഏതെങ്കിലും ഒരു മേഖലയിൽ മാത്രം അറിവുള്ളവർ നേതൃസ്ഥാനങ്ങളിലെത്തുമ്പോൾ സർക്കാർ സേവനങ്ങൾ പോലും ജനങ്ങൾക്കു ലഭ്യമാവാതെവരുന്നതായും കേരള സ്റ്റേറ്റ് ലിറ്ററസി മിഷൻ അതോറിറ്റിയംഗം ഡാന്റീസ് കൂനാനിക്കൽ അഭിപ്രായപ്പെട്ടു. 

 

ടീം വർക്കിനും പഠന കൂട്ടായ്മയുടെ  പ്രവർത്തനങ്ങൾക്കും പുതിയ വിദ്യാഭ്യാസ നയത്തിൽ പ്രാധാന്യമേറുന്നതായും കൂടുതൽ മെച്ചപ്പെട്ട പാരസ്പര്യം ഈ കാലഘട്ടത്തിന്റെ ആവശ്യമാണന്നും അദ്ദേഹം പറഞ്ഞു. കേവലം പാഠപുസ്തകങ്ങൾക്കപ്പുറം അറിവിന്റെ വിശാലലോകത്തേക്കുള്ള പ്ലാറ്റ്ഫോമുകളാണ് സ്കൂളുകളിലെ വിവിധ ക്ലബ്ബുകളെന്നും അദ്ദേഹം തുടർന്നു പറഞ്ഞു. 

കടപ്ലാമറ്റം സെന്റ് ആന്റണീസ് ഹൈസ്കൂളിലെ വിവിധ ക്ലബ്ബുകളുടെ സംയുക്‌ത ഉദ്ഘാടനം നിർവ്വഹിച്ചു സംസാരിക്കുകയായിരുന്നു അദ്ദേഹം. സ്കൂൾ ഹാളിൽ ചേർന്ന സമ്മേളനത്തിൽ അസിസ്റ്റന്റ് മാനേജർ ഫാ.ജോൺ കൂറ്റാരപ്പള്ളിൽ അദ്ധ്യക്ഷത വഹിച്ചു. ഹെഡ് മാസ്റ്റർ പി.എം വർഗ്ഗീസ്, സോജൻ ജേക്കബ്, എയ്സ് വിൻ അഗസ്റ്റ്യൻ, അന്ന ജോം, ആൻ മരിയ ബാബു തുടങ്ങിയവർ പ്രസംഗിച്ചു. വിദ്യാർത്ഥികൾ തയ്യാറാക്കിയ വായനാക്കുറിപ്പ് സമാഹാരത്തിന്റെ പ്രകാശനവും തദ്ദവസരത്തിൽ നടന്നു.