പുതുപ്പള്ളി മണ്ഡലത്തിന്റെ സമഗ്ര വികസനത്തിനുള്ള വിവിധ പദ്ധതികൾ മനസിലുണ്ടെന്നും ഇവയെല്ലാം നടപ്പിലാക്കി നാട്ടുകാർക്ക് നല്കിയ ഉറപ്പ് പാലിയ്ക്കുമെന്നും ചാണ്ടി ഉമ്മൻ എംഎൽഎ. പുതുപ്പള്ളിയിൽ സ്പോർട്സ് സെന്റർ അടക്കം മണ്ഡലത്തിന്റെ വിവിധ പദ്ധതികൾ മനസ്സിലുണ്ടെന്നും ചാണ്ടി ഉമ്മൻ കോട്ടയം പ്രസ് ക്ലബ്ബിൽ മീറ്റ് ദ് പ്രസിൽ സംസാരിച്ചു.
ഒരു കായിക ഇനമോ തിരഞ്ഞെടുക്കപ്പെടുന്ന ഒരു കൂട്ടം കായികയിനങ്ങളോ ഒന്നിച്ചു ചേർത്ത് ഒരു സ്പോർട്സ് സെന്റർ പുതുപ്പള്ളി മണ്ഡലത്തിൽ കൊണ്ടുവരുമെന്ന് ചാണ്ടി ഉമ്മൻ അറിയിച്ചു. ഇതിന്റെ പ്രാഥമിക ജോലികൾ നടന്നു വരുന്നു. സ്പോൺസർഷിപ്പിന് ലുലു ഗ്രൂപ്പിനോടു കഴിഞ്ഞ ദിവസം അഭ്യർഥിച്ചിട്ടുണ്ടെന്നും അദ്ദേഹം പറഞ്ഞു.
മണർകാട്, പുതുപ്പള്ളി കവലകളിലെ ഗതാഗതക്കുരുക്ക് ഒഴിവാക്കാൻ അതതു പഞ്ചായത്തുകളുമായി ചേർന്നു പദ്ധതിയുണ്ടാക്കും. നിലവിൽ പഞ്ചായത്തുകളാണ് ഇവിടെ ഗതാഗത ക്രമീകരണങ്ങൾ ഏർപ്പെടുത്തിയിരിക്കുന്നത്. വിവിധ സ്ഥലങ്ങളിൽ ശുദ്ധജല പദ്ധതികൾ നടപ്പിലാക്കുന്നുണ്ടെന്നും എംഎൽഎ അറിയിച്ചു. ഇത് സംബന്ധിച്ച ചില പ്രചാരണങ്ങൾ അടിസ്ഥാനരഹിതമാണെന്നും അദ്ദേഹം പറഞ്ഞു.
ഭാരത് ജോഡോ യാത്ര ശരിക്കുള്ള പ്രചോദനമാണെന്നും അതിന്റെ ബാക്കിപത്രമാണ് മണ്ഡലത്തിൽ വിജയിച്ച ശേഷം നടത്തിയ പദയാത്ര എന്നും ചാണ്ടി ഉമ്മൻ പറഞ്ഞു. ഇനി 8 പഞ്ചായത്തുകളിലും 2 ദിവസം നീളുന്ന യാത്ര നടത്തണമെന്ന് ആലോചിക്കുന്നുണ്ട്- എംഎൽഎ പറഞ്ഞു.
