കാവുംകണ്ടം: കളമശ്ശേരിയിലെ യഹോവ സാക്ഷിയുടെ പ്രാർത്ഥന സമ്മേളനത്തിലെ ബോംബ് സ്ഫോടനം
മനുഷ്യ മന:സാക്ഷിയെ ഞെട്ടിക്കുന്നതും അത്യന്തം ഭയാശങ്ക ഉളവാക്കുന്നതുമാണെന്ന് എ.കെ.സി.സി കാവും കണ്ടം യൂണിറ്റ്.
'ഡൊമിനിക് മാർട്ടിൻ എന്ന വ്യക്തിയുടെ കുറ്റസമ്മതം അതീവ ഗൗരവതരമായി കാണേണ്ടതാണ്. ഇത്തരം സന്ദർഭത്തിന്റെ പിന്നിൽ മറ്റേതെങ്കിലും ശക്തിയുണ്ടോ എന്ന് പരിശോധിക്കപ്പെടണം'. മതേതര രാജ്യത്ത് മതസൗഹാർദ്ദതയ്ക്ക് തുരങ്കം വെക്കുന്ന ഛിദ്രശക്തികളെ നിയമത്തിന്റെ മുന്നിൽ കൊണ്ടുവരാനും ഇത്തരം ആക്രമണങ്ങളെ നിയന്ത്രിക്കുവാനും വേണ്ട നിയമനടപടികൾ അധികാരികൾ കൈക്കൊള്ളണമെന്ന് യോഗം ആവശ്യപ്പെട്ടു.
സ്ഫോടനത്തിൽ മരണപ്പെട്ടവർക്കും പരിക്കേറ്റവർക്കും അർഹമായ ചികിത്സാ സഹായവും സാമ്പത്തിക സഹായവും ലഭ്യമാക്കാൻ വേണ്ട നടപടി അധികാരികൾ സ്വീകരിക്കണമെന്ന് യോഗം അഭ്യർത്ഥിച്ചു.
നിരവധി പേർക്ക് പരിക്കേൽക്കുകയും നിരപരാധികൾ മരിക്കുകയും ചെയ്ത ദാരുണ സംഭവത്തിൽ കുറ്റക്കാർക്കെതിരെ കർശനം നടപടി സ്വീകരിക്കണമെന്ന് യോഗം പാസാക്കിയ പ്രമേയത്തിലൂടെ അധികാരികളോടാവശ്യപ്പെട്ടു.
പ്രസിഡന്റ് അഭിലാഷ് കോഴിക്കോട്ട് മീറ്റിങ്ങിൽ അധ്യക്ഷത വഹിച്ചു. ഡേവിസ് കെ മാത്യു കല്ലറയ്ക്കൽ, രാജു അറയ്ക്കകണ്ടത്തിൽ, ജസ്റ്റിൻ മനപ്പുറത്ത്, സിജു കോഴിക്കോട്ട്, ബിജു കോഴിക്കോട്ട്, രഞ്ജി തോട്ടക്കുന്നേൽ, ബേബി തോട്ടാക്കുനേൽ, ബിജു ഞള്ളായിൽ തുടങ്ങിയവർ പ്രസംഗിച്ചു.
