പൂഞ്ഞാർ: പൂഞ്ഞാർ മണ്ഡലത്തിലെ നവകേരള സദസുമായി ബന്ധപ്പെട്ട് തിടനാട് ഗ്രാമപഞ്ചായത്തിൽ അവലോകനയോഗം സംഘടിപ്പിച്ചു. നിയോജകമണ്ഡലതല സംഘാടകസമിതി അധ്യക്ഷൻ കൂടിയായ അഡ്വ.സെബാസ്റ്റ്യൻ കുളത്തുങ്കൽ എം.എൽ.എ യോഗം ഉദ്ഘാടനം ചെയ്തു. ഗ്രാമപഞ്ചായത്ത് പ്രസിഡന്റ് വിജി ജോർജ് അധ്യക്ഷത വഹിച്ചു.
യോഗത്തിൽ നവകേരള സദസുമായി ബന്ധപ്പെട്ട പഞ്ചായത്ത്തല പ്രവർത്തനങ്ങൾ വിശകലനം ചെയ്തു. വീട്ടുമുറ്റ സദസുകൾ നവംബർ 30നകം പൂർത്തികരിക്കാനും മുഖ്യമന്ത്രിയുടെ ക്ഷണക്കത്ത് എല്ലാ വീടുകളിലും എത്തിക്കാനും യോഗം തീരുമാനിച്ചു.
നവകേരളസദസിനെ വരവേൽക്കാൻ മെഗാ തിരുവാതിരയും വിളംബര ജാഥയും സാംസ്‌കാരിക സദസും സംഘടിപ്പിക്കും. ഓരോ ബൂത്തിൽനിന്നു സദസിനെത്തുന്നവരുടെ പട്ടിക തയാറാക്കി വാഹനസൗകര്യം ഉറപ്പുവരുത്തണം. സദസിന്റെ വേദിയ്ക്കരികിൽ ഒരുക്കുന്ന പരാതി പരിഹാര പ്രക്രിയയെക്കുറിച്ച് ജനങ്ങളെ ബോധവത്കരിക്കണം.
യോഗത്തിൽ വൈസ് പ്രസിഡന്റ് ലീന ജോർജ്, ഗ്രാമപഞ്ചായത്തംഗങ്ങളായ ഓമന രമേശ്, പ്രിയ ഷിജു, ജോസ് ജോസഫ്, സ്‌കറിയ ജോസഫ്, ഷെറിൻ ജോസഫ്, ഡെപ്യൂട്ടി തഹസിൽദാർ പി.എൻ ശ്യാമളകുമാരി, ഗ്രാമപഞ്ചായത്ത് സെക്രട്ടറി എം.സാജൻ, രാഷ്ട്രീയപ്രതിനിധി ജോയി ജോർജ് എന്നിവർ പങ്കെടുത്തു.
