പത്തനംതിട്ടയിൽ നിന്നും കോയമ്പത്തൂരിലേക്ക് ഉള്ള യാത്രയിൽ റോബിൻ അങ്കമാലി പിന്നിട്ടു. വഴിനീളെ വമ്പൻ സ്വീകരണമാണ് ബസിനും ഉടമ ബേബി ഗിരീഷിനും ലഭിക്കുന്നത്. ഓരോ ടൗണിലും ജനങ്ങൾ മുൻകൂർ കാത്തുനിൽക്കുകയാണ്.. ബസ് എത്തുന്നതോടെ പടക്കം പൊട്ടിച്ചും പൂമാല അണിയിച്ചും മധുരവും പഴക്കുലകളും സമ്മാനിക്കുന്നുണ്ട്.
മോട്ടര്‍ വാഹനവകുപ്പിനെ വെല്ലുവിളിച്ച് ഇന്ന് രാവിലെ പത്തനംതിട്ട സ്വകാര്യ ബസ് സ്റ്റാൻഡിൽ നിന്ന് യാത്ര തുടങ്ങിയ ബസ് 100 മീറ്റർ പിന്നിട്ടപ്പോൾ പരിശോധനയുമായി എംവിഡി എത്തി. പെർമിറ്റ് ലംഘിച്ചെന്ന കുറ്റം ചുമത്തി 7500 രൂപ പിഴയിട്ടു. പരിശോധന തുടരുമെന്ന് എംവിഡി അറിയിച്ചിരുന്നു. തുടർന്ന് പാലായിൽ വച്ച് മോട്ടർ വാഹന വകുപ്പ് ഉദ്യോഗസ്ഥർ വീണ്ടും ബസ് തടഞ്ഞു. എന്നാൽ നാട്ടുകാരുടെ ഭാഗത്തു നിന്ന് പ്രതിഷേധം ഉണ്ടായതിനെ തുടർന്ന് ബസ് വിട്ടയച്ചു.
അതേസമയം കോടതിയാണോ മോട്ടർവാഹന വകുപ്പാണോ വലുതെന്ന് നോക്കാമെന്നും ഗതാഗതമന്ത്രിയുടെ പിടിവാശി അംഗീകരിക്കില്ലെന്നും ആയിരുന്നു ബസ് ഉടമ ബേബി ഗിരീഷിന്റെ പ്രതികരണം. കോയമ്പത്തൂർ വരെ ഗിരീഷും ബസിലുണ്ട്. ഓഗസ്റ്റ് 30നാണ് റോബിന് ബസ് പത്തനംതിട്ടയില്‍ നിന്നും കോയമ്പത്തൂരിലേക്കു സര്‍വീസ് ആരംഭിച്ചത്.
സെപ്റ്റംബര്‍ ഒന്നിന് രാവിലെ റാന്നിയില്‍ വച്ച് മോട്ടോര്‍ വാഹനവകുപ്പ് നടത്തിയ പരിശോധനയില്‍ ഉദ്യോഗസ്ഥര്‍ ബസിന്‍റെ ഫിറ്റ്നസ് റദ്ദാക്കുകയായിരുന്നു. വൈപ്പർ ബ്ലേഡിനു കനംകുറവ്. മഡ്ഫ്ലാപ് നട്ട് അയഞ്ഞു കിടക്കുന്നു. ബ്രേക്ക് ചവിട്ടുമ്പോൾ എയർ പോകുന്ന ശബ്ദം കേൾക്കുന്നു. യാത്രക്കാരുടെ ഫുട്‌റെസ്റ്റിന്റെ റബറിനു തേയ്മാനം. എന്നിങ്ങനെയുള്ള കുറ്റങ്ങളാണു കണ്ടെത്തിയത്. 45 ദിവസങ്ങൾക്കു ശേഷം കുറവുകൾ പരിഹരിച്ചു ഫിറ്റ്നസ് ടെസ്റ്റ് പാസായി.
