ഈരാറ്റുപേട്ട : അഡ്വ. സെബാസ്റ്റ്യൻ കുളത്തുങ്കൽ എം. എൽ എയുടെ നേതൃത്വത്തിലുള്ള എംഎൽഎ സർവീസ് ആർമിയുടെ വിദ്യാഭ്യാസ ഗുണമേന്മ പദ്ധതിയായ ഫ്യൂച്ചർ സ്റ്റാർസ് എജ്യുക്കേഷൻ പ്രോജക്റ്റിന്റെ ആഭിമുഖ്യത്തിൽ കായിക പ്രതിഭകളെയും, സർവകലാശാല റാങ്ക് ജേതാക്കൾ ഉൾപ്പെടെയുള്ള വിദ്യാർത്ഥി പ്രതിഭകളെയും ആദരിക്കുന്ന പ്രതിഭാ സംഗമം ഈ മാസം 30ന് ഉച്ചകഴിഞ്ഞ് 2 മണിക്ക് പൂഞ്ഞാർ എസ്. എം. വി സ്കൂളിൽ നടക്കുമെന്ന് അഡ്വ. സെബാസ്റ്റ്യൻ കുളത്തുങ്കൽ എംഎൽഎ അറിയിച്ചു.
ഇക്കഴിഞ്ഞ സംസ്ഥാന സ്കൂൾ കായികമേളയിൽ സ്വർണ്ണം, വെള്ളി, വെങ്കലം മെഡലുകൾ വ്യക്തിഗത, ടീം ഇനങ്ങളിൽ നേടിയ കായിക പ്രതിഭകളെയും, ദ്രോണാചാര്യ കെ.പി തോമസ് മാഷ് ഉൾപ്പെടെ കുട്ടികളെ പരിശീലിപ്പിച്ച കായിക അധ്യാപകരെയും സംഗമത്തിൽ ആദരിക്കും.
കൂടാതെ ഇക്കഴിഞ്ഞ അധ്യായന വർഷത്തിൽ വിവിധ അംഗീകൃത സർവകലാശാലകളിൽ നിന്നും യൂണിവേഴ്സിറ്റി പരീക്ഷകളിൽ ആദ്യ 10 റാങ്കുകളിൽ ഏതെങ്കിലും റാങ്ക് കരസ്ഥമാക്കിയവരെയും, പി എച്ച് ഡി നേടിയവർ ഉൾപ്പെടെ അക്കാദമിക് രംഗത്ത് വളരെ മികച്ച നേട്ടങ്ങൾ കൈവരിച്ച പൂഞ്ഞാർ നിയോജക മണ്ഡലത്തിൽപെട്ടവരെയുമാണ് ചടങ്ങിൽ ആദരിക്കുന്നത്.
ഏതെങ്കിലും വിഭാഗത്തിൽ നേട്ടങ്ങൾ കൈവരിച്ച പൂഞ്ഞാർ നിയോജക മണ്ഡലത്തിൽപ്പെട്ട വിദ്യാർത്ഥികളും പ്രതിഭകളും വിശദാംശങ്ങൾ 25.11.2023 നകമായി താഴെപ്പറയുന്ന നമ്പറുകളിൽ അറിയിക്കേണ്ടതാണ്.
99614 01605, 94466 02182,9446984937
