കോട്ടയം: നവകേരള സദസ്സിന് വേണ്ടി സർക്കാർ സംവിധാനങ്ങളെല്ലാം ദുരുപയോഗിച്ച സർക്കാർ ശബരിമല തീർത്ഥാടകരെ തീർത്തും അവഗണിക്കുകയാണ്. സ്ത്രീ പ്രവേശന വിഷയത്തിൽ പിണറായിക്കുണ്ടായ തിരിച്ചടിയിൽ പകപോക്കുവാനുള്ള ശ്രമമാണിതെന്ന് സംശയിക്കാം. തീർത്ഥാടകർക്ക് വേണ്ട സൗകര്യങ്ങളൊരുക്കുന്നതിൽ പരാജയപ്പെട്ട സർക്കാർ അനാവശ്യ നിബന്ധനകൾ തീർത്ഥാടകരുടെ മേൽ അടിച്ചേൽപ്പിക്കുകയാണെന്ന് പി.സി ജോർജ് കുറ്റപ്പെടുത്തി.
പരമ്പരാഗതമായി അന്യസംസ്ഥാനങ്ങളിൽ നിന്ന് ഉൾപ്പെടെയുള്ള തീർത്ഥാടകർ തീർത്ഥാടക വഴിയിൽ ഭക്ഷണം പാകം ചെയ്ത് കഴിച്ചാണ് യാത്ര ചെയ്‌തിരുന്നത്. സർക്കാർ ഇതിന് നിയന്ത്രണം ഏർപ്പെടുത്താൻ ശ്രമിക്കുന്നത് തീർത്ഥാടകർക്ക് ബുദ്ധിമുട്ട് സൃഷ്ടിക്കും.
നവകേരള സദസ്സിനുവേണ്ടി ഹോട്ടൽ ഉടമകളിൽ നിന്ന് വൻതുക പിരിവ് മേടിച്ചതിനുള്ള പ്രത്യുപകാരമായിട്ടേ സർക്കാരിൻ്റെ ഈ നീക്കം കണക്കാക്കാനാവൂ. തീർത്ഥാടകർക്ക് അടിയന്തിരമായി സഹായം ചെയ്‌തില്ലെങ്കിൽ സർക്കാർ ശക്തമായ തിരിച്ചടി നേരിടുമെന്നും പി.സി ജോർജ് പറഞ്ഞു.
