പാലാ: ലോകമാനസിക ആരോഗ്യ ദിനമായ ഒക്ടോബർ 10 ന് മരിയസദനത്തിന് ആവശ്യമായ സാമ്പത്തിക സഹകരണം കഴിയുന്നത്ര സുമനസ്സുകളിൽ നിന്ന് സമാഹരിക്കുക എന്ന ലക്ഷ്യത്തോടെ ജനപ്രതിനിധികളായ നഗരസഭ കൗൺസിലർമാരുടെയും, ജില്ലാ പഞ്ചായത്ത് അംഗങ്ങളുടെയും, ബ്ലോക്ക് പഞ്ചായത്ത് അംഗങ്ങളുടെയും, പഞ്ചായത്ത് പ്രസിഡന്റുമാരുടെയും അംഗങ്ങളുടെയും ഒരു യോഗം നാളെ (സെപ്റ്റംബർ 24, ചൊവ്വാഴ്‌ച) ഉച്ചകഴിഞ്ഞ് 2 മണിക്ക് നടക്കും.
മരിയസദനത്തിലും അനുബന്ധ സ്‌ഥാപനങ്ങളിലുമായി നിലവിൽ 540 ലേറെ ആളുകൾ വസിക്കുന്നുണ്ട്. അനുവദനീയമായതിൻ്റെ ഇരട്ടി സംഖ്യയാണിത്. ദിനംതോറും സ്‌ഥാപനത്തിൽ എത്തിച്ചേരുന്ന രോഗികളുടെയും അനാഥരുടെയും എണ്ണത്തിൽ വൻവർദ്ധനയാണ് മരിയസദനം ഇപ്പോൾ അഭിമുഖീകരിക്കുന്ന പ്രധാന പ്രശ്നം.
നിലവിൽ രണ്ടു കോടി രൂപയുടെ കടബാധ്യത മരിയസദനത്തിനുണ്ട്. കൂടാതെ മരിയസദനത്തിന്റെ പ്രവർത്തനത്തിന് പ്രതിമാസം 25 ലക്ഷം രൂപ ചിലവുണ്ട്. ഇത് പരിഹരിക്കുക എന്ന ലക്ഷ്യത്തോടെ കഴിഞ്ഞ ദിവസം ഒരു ജനകീയ കൂട്ടായ്‌മ നടത്തുകയുണ്ടായി.
സന്മനസ്കരായ ആളുകളുടെ സഹായസഹകരണങ്ങൾ കൊണ്ടാണ് മരിയസദനം നിലനിൽക്കുന്നത്. ആളുകൾ അധികമാകുമ്പോൾ അവരെ സംരക്ഷിക്കാനുള്ള സ്‌ഥലപരിമിതികൾ പ്രധാന വെല്ലുവിളിയായി മാറുന്നു. ഇടപ്പാടിയിൽ 60 സെന്റും, പൂവരണിയിൽ ഒന്നര ഏക്കർ സ്‌ഥലവും സൗജന്യമായി ലഭിച്ചിട്ടുണ്ട്. ഇവിടങ്ങളിൽ ആളുകളെ പുനരധിവസിപ്പിക്കുന്നതിന് കെട്ടിടങ്ങൾ നിർമ്മിക്കുന്നത് വഴി 250 ആളുകളെ മാറ്റിപ്പാർപ്പിക്കുവാൻ കഴിയും. ഇതിന് ധനസഹായം ആവശ്യമാണ്. ഇത് ഉടൻ നടപ്പിലാക്കേണ്ടത് മരിയസദനത്തിൻ്റെ നിലനിൽപ്പിന് നിയമപരമായ ആവശ്യമായി ഇപ്പോൾ വന്നിരിക്കുന്നു.
.jpeg)
